काठमाडौँ : नेपाली काँग्रेसले अधिवेशन रोकिएका १३ जिल्लामा वडा अधिवेशन गर्ने भएको छ । शनिबार २७ गते प्रक्रिया रोकिएका १३ जिल्लाको वडा अधिवेशन गर्ने कांग्रेसले जनाएको छ । 

भदौ १८ गते वडा अधिवेशन सुरु भएपनि क्रियाशील विवादका कारण १३ जिल्लामा अधिवेशन प्रक्रिया रोकिएको थियो । १३ जिल्लाको क्रियाशील सदस्यता विवाद किस्ता किस्तामा टुंग्याउने क्रममा मंगलबार रौतहटको क्रियाशील विवाद मिलेको थियो ।

काँग्रेस केन्द्रीय कार्यालयले बारा र रौतहटको पनि क्रियाशील सदस्यता सार्वजनिक गरेको छ । योसँगै बाँकी १३ जिल्लामा वडा अधिवेशन गर्ने हुने निश्चित भएको छ ।

कात्तिक २७ गते सप्तरी, सिराहा, सर्लाही, बारा, पर्सा, रौतहट, धनुषा, महोत्तरी, सुर्खेत, डोल्पा, कैलाली, रसुवा र बाँके गरी १३ जिल्लामा वडा अधिवेशन हुन लागेको हो । वडा अधिवेशन हुन बाँकी १३ जिल्लामा काँग्रेस निर्वाचन समितिले निर्वाचन अधिकृत खटाइएको छ । 

केन्द्रीय निर्वाचन समितिले पठाएका निर्वाचन अधिकृतहरु वडा अधिवेशनको तयारीमा जुटेका छन् । उनीहरुले सम्बन्धित जिल्लामा वडा अधिवेशनका लागि निर्वाचन प्रतिनिधि खटाउने काम भइरहेको केन्द्रीय निर्वाचन समितिका सदस्य सचिव जगन्नाथ श्रेष्ठले बताए ।

जिल्लाका सबै वडा र नगरमा निर्वाचन अधिकृतलाई खटाउन अभिमुखीकरण पनि गरिसकिएको छ । जिल्लामा खटाएका निर्वाचन अधिकृतले सम्बन्धित जिल्लाका नेता कार्यकर्तासँग पनि छलफल गरिरहको छन् ।

वडा अधिवेशनको तयारीका लागी बुधबार काँग्रेस कैलालीले निर्वाचन अधिकृत टेकप्रसाद सुवेदीसँग छलफल गरेका थिए । कैलालीका मोहोन्याल गाउँपालिका, चुरे गाउँपालिकाका पहाडी क्षेत्र तथा टाढा रहेका वडा तथा नगरमा बुधबार नै निर्वाचन अधिकृतलाई खटाइसकिएको सुवेदीले बताए ।

कैलालीका एक सय २६  वडा र १३ वटै पालिकामा निर्वाचन अधिकृत खटाउने काम भइरहेको उनको भनाइ छ । १४ जिल्ला ९सिन्धुपाल्चोकमा पालिका बाँकी० मा कात्तिक ३० गते पालिका अधिवेशन हुने छ । 

हिमाली १३ जिल्लामा जिल्ला अधिवेशन समेत सम्पन्न गरिसकेको काँग्रेसले बाँकी हिमाली जिल्ला सोलुखुम्बु, दार्चुला र म्याग्दीमा कात्तिक २७ प्रदेशसभा निर्वाचन क्षेत्रीय अधिवेशन गर्दै छ ।
उक्त तीन जिल्लामा जिल्ला अधिवेशन भने मंसिर एक गते हुने छ । यस्तै जिल्ला अधिवेशन हुन बाँकी जुम्लामा पनि मंसिर एक गते अधिवेशन हुने छ । 

बाँकी ६१ जिल्लामा मंसिर ३ गते प्रदेशसभा क्षेत्रीय अधिवेशन र मंसिर ६ गते प्रतिनिधिसभा क्षेत्रीय र एक निर्वाचन भएको जिल्ला अधिवेशन हुने छ । मंसिर १० गते एकभन्दा बढी प्रतिनिधिसभा निर्वाचन क्षेत्र भएको जिल्लामा अधिवेशन हुनेछ ।