नवलपरासीः पूर्वपश्चिम राजमार्गअन्तर्गत खरकट्टा जङ्गलमा स्कुटर दुर्घटना हुँदा एक जनाको निधन भएकाे छ। नवलपरासी (बर्दघाट सुस्तापूर्व)काे कावासोतीमा गए राति स्कुटर दुर्घटना हुँदा कावासोती नगरपालिका–२ का ३५ वर्षीय जीवन रानाको निधन भएको हाे।
जिल्ला प्रहरी कार्यालयका प्रहरी नायब उपरीक्षक दिलीपकुमार गिरीका अनुसार जङ्गलमा लु५८प ७०४८ नंको स्कुटर र चालक लडिरहेको भन्ने सूचनाका आधारमा घटनास्थल पुगेको प्रहरीले रानालाई राति नै उद्धार गरी उपचारका लागि मध्यविन्दु जिल्ला अस्पताल पुर्याएको थियो।
जिल्ला अस्पतालबाट थप उपचारका लागि पुरानो मेडिकल कलेज भरतपुर सिफारिस गरिएकामा पुरनो मेडिकल कलेजले रानालाई मृत घोषणा गरेको प्रहरी नायब उपरीक्षक गिरीले जानकारी दिए।
दुर्घटनाको कारण नखुलेको प्रहरीले जनाएको छ। रातको समयमा आफैँ अनियन्त्रित भएर दुर्घटना भएको हो वा कुनै सवारीले ठक्कर दिएको हो भन्ने विषयमा अनुसन्धान भइरहेको उनले बताए।
प्रतिक्रिया