काठमाण्डौँ : आगामी कात्तिक २५ गतेदेखि राष्ट्रिय जनगणना सुरु  हुने भएको छ । कात्तिकमा सुरु हुने जनगणना मंसिर ९ गतेसम्म हुने केन्द्रीय तथ्याङ्क विभागले जनाएको छ ।

सरकारले हरेक १० वर्षमा गर्दै आएको जनगणना यसअघि जेष्ठ २५ गतेदेखि असार ८ गतेसम्म सक्ने लक्ष्य लिएको थियो । तर, कोभिड–१९ महामारीका कारण पूर्वनिर्धारित कार्यक्रम स्थगन गरिएको थियो ।

यसअघि स्थगन भएको जनगणना मन्त्रीपरिषद्को निर्णयसँगै फेरी सुरु हुने भएको हो । यही भदौ २१ गते बसेको मन्त्रीपरिषद्को बैठकले कात्तिक अन्तिमदेखि राष्ट्रिय जनगणना गर्ने तथ्याङ्क विभागको प्रस्ताव स्वीकृत गरेको थियो ।

यही कात्तिकदेखि हुने जनगणना नेपालको जनगणनाको १२ औँ शृङ्खला हो । जनगणनामा नेपालको घर, परिवार तथा व्यक्तिहरूको निश्चित अवधिमा निश्चित विधि अपनाई पूर्णरुपमा गणना गर्नुपर्ने हुन्छ । यसपटकको जनगणनामा ३९ हजार गणक तथा ८ हजार सुपरीवेक्षक अनुमानित ७० लाख परिवार तथा ३ करोड जनसङ्ख्याको गणना १५ दिनको अवधिमा सम्पन्न गर्ने छ ।