काठमाडौं : नेपाली कांग्रेसका वरिष्ठ नेता रामचन्द्र पौडेलले प्रधानमन्त्री केपी शर्मा ओलीको असंवैधानिक कदमलाई सभापती शेरबहादुर देउवाले साथ दिएको बताएका छन् । आइतबार प्रेस युनियन सुनसरीको आयोजनामा इटहरीमा आगोजित पत्रकार सम्मेलनमा यस्तो बताएका हुन् ।  

वरिष्ठ नेता पौडेलले सभापति देउवाको समर्थनकै कारण प्रधानमन्त्री ओली थप अधिनायकवादतर्फ उन्मुख भएको पनि बताए । ओली र देउवाका कारण लोकतन्त्र गणतन्त्र र संविधान नै धरापमा परेको बताए ।  

‘देउवाको साथ र समर्थन पाएपछि ओली झन् अधिनायकवादी बन्न थाले’, पौडेलले भने, ‘संविधान, लोकतन्त्र, गणतन्त्र र संघीयता धरापमा पर्ने खतरा बढ्यो।’कार्यकर्तालाई आन्दोलित हुन आह्वान गर्दै पौडेलले प्रतिनिधि सभा विघटन असंवैधानिक भन्ने कांग्रेसको आधिकारिक निर्णय भएको बताए । 

पौडेलले संविधानको रक्षा कांग्रेसको काँधमा आएको भन्दै संसद विघटनका विपक्षमा उभिन आग्रह गरेका छन् ।  उनले कांग्रेसले अदालतको फैसलालाई मान्ने बताए पनि अदालतको फैसला कुरेर अहिले मौन बस्न नमिल्ने बताए। उनले सरकारले गरेका भ्रष्टाचार, गैरसंवैधानिक नियुक्तिमा पनि देउवाले ओलीलाई साथ दिएको आरोप लगाए।