कञ्चनपुरः शुक्लाफाँटा राष्ट्रिय निकुञ्जमा सोमबार घाइते अवस्थामा भेटिएको पाटे बाघको मृत्यु भएको छ। निकुञ्जका सहायक संरक्षण अधिकृत रविन चौधरीले शुक्लाफाँटाको दक्षिण क्षेत्रमा रहेको नेपाल–भारत २४ नम्बर सीमास्तम्भ नजिक भेटिएको घाइते अवस्थामा रहेकाे बाघकाे मृत्यु भएकाे जानकारी दिए। 

“हिजो पर्यटक पथप्रदर्शकले भाले बाघ घाइते देखेपछि निकुञ्ज प्रशासनमा खबर गरे”, सहायक संरक्षण अधिकृत चौधरीले भने, “राति घाइते बाघको मृत्यु भयो।”

मृत बाघको निकुञ्ज कार्यालयमा शव परीक्षण हुने उनले बताए। “शव परीक्षण रिपोर्टपछि घटनाबारे विस्तृतमा थाहा हुन्छ”, उनले भने, “अहिले हामी अनुसन्धान गर्दैछौँ।”

उनले सीमा क्षेत्रमा भेटिएकाले बाघ नेपाल वा भारतको हो भन्नेबारे पनि अनुसन्धान थालिएको बताए। निकुञ्जमा १६ वटा पाटे बाघ रहेका छन्।