उदयपुरः जिल्लाको बेलका नगरपालिका–८ कोठुमा प्रहरीले अवैध गाँजासहित एक युवकलाई पक्राउ गरेको छ। जिल्ला प्रहरी कार्यलय उदयपुरका अनुसार सात केजी गाँजासहित एक जनालाई पक्राउ गरिएकाे हाे। 

पक्राउ पर्नेमा बेलका नगरपालिका–७ का २४ वर्षीय अनिश राई रहेका छन्। सोमबार साँझ ५ बजे ना४च १५१६ नम्बरकाे पिकअप भ्यानमा सवार राई बरगाछी बजारतिर आउँदै गर्दा गस्तीमा रहेको प्रहरीले शङ्का लागेर जाँच गर्दा पक्राउ परेको प्रहरी प्रमुख भीमप्रसाद दाहालले बताए। 

इलाका प्रहरी कार्यालय बेलका रामपुर ठोकसिलाको गस्ती प्रहरी टोलीले राईलाई गाँजासहित पक्राउ गरेपछि इप्रका बेलकामा राखेर अनुसन्धान शुरु गरिएको प्रहरीले बताएको छ।