काठमाडौँ : सिरहाको गोलबजार नगरपालिका स्थित ज्योती स्टिल फर्निचरको गोदाममा आगलागी हुँदा करिब १२ लाख रुपैयाँ बराबरको धनमाल नष्ट भएको छ ।  गोलबजार नगरपालिका–६ बस्ने ज्योती नायकको ज्योती स्टिल फर्निचरको गोदाममा करेण्ट सर्ट भई सोमबार दिउँसो आगलागी भएको प्रहरीले जनाएको छ ।

मोरङ शनिश्चरेका शुभल चन्द्रबंशीको घरको पूजाकोठामा बालेको दियोबाट आगो सल्किएर सोमबार बिहान आगलागी हुँदा घर, अन्नपात, फर्निचर, विभिन्न सामान, कृषि विकास बैंकबाट जग्गा किन्नलाई लिएको नगद  ३६ लाख ७७ हजार रुपैयाँ, ८ तोला सुन र २० तोला चाँदी  समेत जलेर नष्ट भएको छ । 

त्यस्तै, कास्कीको पोखरा महानगरपालिका–२७ मा ‘एस सुबेदी’ किराना पसलमा आगलागी हुँदा करिब ४० लाख रुपैयाँ बराबरको धनमाल नष्ट भएको छ ।
सोमबार राति आगलागी हुँदा किराना पसलभित्र रहेका विभिन्न सामान जलेर नष्ट भएको हो । 

एदयपुर कटारीका रिजु राईको घरबाट आगो सल्कीएर उनकै वुवा खगेन्द्र राई र सोही ठाउँ बस्ने दाजु अलम्वर राईको घरमा समेत क्षति पुगेको प्रहरीले जनाएको छ । सोमबार दिउँसो आगलागी हुँदा ३ वटा घर जलेर करिब ८ लाख २० हजार रुपैयाँ बराबरको धनमाल नष्ट भएको बताइएको छ ।

यस्तै, ताप्लेजुङको सिदिङवा गाउँपालिका–५ चुम्बुङ बस्ने प्रविन बस्नेतको घरमा पनि आगलागी हुँदा करिब १५  लाख रुपैयाँ बराबरको धनमाल नष्ट भएको छ । सोमबार राति पूजा कोठामा बालेको दियोबाट सल्किएको आगोले घर, अन्नपात, लत्ताकपडा, भाडावर्तन जलेर नष्ट हुँदा करिब १५  लाख रुपैयाँ बराबरको धनमाल नष्ट भएको प्रहरीले जनाएको छ । 

प्रहरी, दमकल र स्थानीय बासिन्दाको सहयोगमा आगलागी नियन्त्रणमा लिइसकिएको छ  । यस सम्बन्धमा प्रहरीले आवश्यक अनुसन्धान पनि गरिरहेको बताइएको छ ।