काठमाडौं : दलित समुदायबाट जननिवार्चित  पहिलो सांसद कृष्णसिंह परियारको निधन भएको छ । ६८ वर्षीय पूर्वसांसद परियारको आज बिहान ७ः३० बजे नेपालगन्ज–१२ कोरियनपुरस्थित आफ्नै निवासमा निधन भएको पूर्वसांसद परियार २०४८ सालको निर्वाचनमा बाँके क्षेत्र नं ३ बाट प्रतिनिधि सभामा प्रत्यक्ष निर्वाचित भएका थिए।

नेपाली कांग्रेसबाट निर्वाचित परियार तत्कालीन राज्य व्यवस्था समितिका पूर्व सभापति समेत थिए । नेपालको इतिहासमा दलित समुदायबाट पहिलाे पटक प्रतिनिधिसभा सदस्य निर्वाचित परियार इमानदार, निष्ठावान र सादगी नेताका रुपमा परिचित थिए ।

परियारको निधनले नेपालको लोकतान्त्रिक र दलित आन्दोलनमा अपूरणीय क्षति पुगेको नेपाली कांग्रेसका महामन्त्री पूर्णबहादुर खड्काले बताए ।