झापाः कनकाई नगरपालिकाका प्रमुख राजेन्द्र पोखरेलले आफूले नगरपालिकाबाट पारिश्रमिक तथा भत्तावापत प्राप्त गरेको रू १० लाख अक्सिजन प्लान्ट निर्माणमा सहयोग गरेका छन्। महामारीमा अक्सिजनको माग उच्च भइरहेको हुँदा नगरमा सञ्चालित अस्पतालमा अक्सिजन प्लान्ट निर्माण गर्न उक्त सहयोग दिएको नगरप्रमुख पोखरेलले बताए।

पाेखरेलले रू १० लाखको चेक नगरपालिकालाई हस्तान्तरण गरेकाे नगरपालिकाका प्रमुख प्रशासकीय मोहनप्रसाद न्यौपानेले जानकारी दिए। पोखरेलले निर्वाचित भएलगत्तै आफूले पारिश्रमिक र भत्तावापत पाउने सबै सुविधा सामाजिक सेवामा खर्च गर्ने घोषणा गरेका थिए। 

नगरमा हाल १५ शय्याको नगरस्तरीय अस्पताल सञ्चालनमा छ। त्यहाँ दुई करोडको लागतमा अक्सिजन प्लान्ट स्थापना गर्ने नगरको लक्ष्य छ। यसका लागि नगरको चालु बजेटबाट रू एक करोडसम्म उपयोग गरिने र स्थानीय सहयोगबाट रू एक करोडको आश्वासन प्राप्त भएको उनले बताए।

अस्पताललाई ५० शय्यामा विस्तार गर्नेसमेत नगरको योजना छ। “कोरोना महामारीबाट नागरिक एकदमै ठूलो पीडामा छन्”, उनले भने, “अहिले बरु सडक पक्की गर्दैनौँ, स्वास्थ्य सेवालाई भरपर्दो बनाउँछौँ।”

यसअघि पनि पाेखरेलले पारिश्रमिककाे रू तीन लाख ४० हजार नगरका श्रमिक वर्गको सार्वजनिक हित कोषमा जम्मा गरेका थिए। आर्थिक वर्ष २०७४/७५ मा गाडी खरिद शीर्षकमा नगरपालिकाले छुट्याएको रू ४० लाख बजेट नगरप्रमुखले सडक निर्माणमा लगाएका थिए।

विसं २०७० मा नगरपालिकाले किनेको गाडीले नै काम चलिरहेको जनाउँदै नगरप्रमुख पोखरेलले नयाँ गाडी किन्न आवश्यक नरहेको बताएका थिए। आव २०७६/७७ मा नगरप्रमुख चढ्ने छुट्टै सवारी साधन खरिदका लागि नगरपालिकाले फेरि रू ६० लाख बजेट विनियोजन गरेको थियो। नगरप्रमुख पोखरेलले गाडी किन्न अस्वीकार गर्दै सो रकम नगरपालिका आफैँले स्थापना गरेको प्राविधिक कलेजलाई प्रदान गरेका थिए।

नगरपालिकाले सो रकम खर्च गरेर वडा नं ७ मा कनकाई पोलिटेक्निक इन्स्टिच्युट नामक प्राविधिक कलेज सञ्चालनमा ल्याएको छ। कलेजमा सिभिल इञ्जीनियरिङ, जियोमेट्रिकक इञ्जीनियरिङ र इनफर्मेशन टेक्नोलोजीको पढाइ भइरहेको छ।