काठमाडौं : क्रियाशील दलित पत्रकार संघ नेपाल(आडजोन)ले नेपाल पत्रकार महासंघको केन्द्रीय समितिमा नवनिर्वाचित दलित पत्रकारहरुलाई बधाई तथा सम्मान कार्यक्रम सम्पन्न गरेको छ ।  मंगलबार काठमाडौंमा आयोजित एक कार्यक्रमकाबीच महासंघको केन्द्रीय समितिमा निर्वाचित पदाधिकारीलाई सम्मान गरेको हो । कार्यक्रममा नेपाल पत्रकार महासंघका नवनियुक्त केन्द्रीय सचिव हेमकर्ण बिक, सदस्यहरु प्रकाश धौलाकोटी, सरीता बराईली, राधा नेपाली लगायतलाई बधाई तथा सम्मान ज्ञापन गरिएको थियो ।  

बधाई तथा सम्मान कार्यक्रमलाई सम्बोधन गर्दै विवेकशील साझा पार्टीका केन्द्रीय सदस्य  सूचना तथा सञ्चार विभाग प्रमुख   प्रकाशचन्द्र परियारले नव नियुक्त पदाधिकारीलाई बधाई दिँदै दलित समुदायका पत्रकार र सिंगो समुदायका सवालमा आवाज उठाउन आग्रह गरे । उनले प्रेस काउन्सिलले धेरैै पक्ष समेटेर पुरस्कार दिए पनि दलित समुदायका पत्रकार लक्षित पुरस्कारको व्यवस्था नगरेको भन्दै यसको पहल कदमी लिनु पर्नेमा जोड दिएका थिए । 

महासंघको पूर्व केन्द्रीय सदस्य समेत रहेका परियारले आफूहरुको कार्यकालमा निकै चुनौती खेपेर दलित समुदायका पत्रकारको हितमा लड्नु परेको भन्दै अब महासंघमा दलित पत्रकारहरुको उपस्थिति बढाउन जरुरी रहेको बताए । उनले महासंघ पदाधिकारीलाई प्रत्येक बैठकमा अनिवार्य उपस्थिति हुन पनि आग्रह गरे ।

कार्यक्रममा बोल्दै आडजोनका अध्यक्ष पवित्रा सुनारले पत्रकारका पीडा पत्रकारले नै बुझ्न सक्ने भएकाले क्रियाशील पत्रकारको महासंघमा उपस्थितिले खुशी लागेको बताइन् । पत्रकार महासंघका हरेक कदममा क्रियाशील दलित पत्रकार संघ साथ र सहकार्यका लागि तयार पनि रहेको अध्यक्ष सुनारको भनाई थियो । 

यस्तै कार्यक्रममा आफ्ना धारणा राख्दै नव नियुक्त पदाधिकारीहरुले दलित समुदायका पत्रकारका विषयमा सधैँ आवाज उठाउने प्रतिबद्धता जनाएका थिए । साथै उनीहरुले सदैव सुझाव सल्लाहको अपेक्षा समेत गरेको बताए । कार्यक्रममा क्रियाशील दलित पत्रकार संघका विभिन्न पदाधिकारीको समेत उपस्थिति रहेको थियो ।  कार्यक्रमको संचालन आडजोन उपत्यकाका उपाध्यक्ष एलबी विश्वकर्माले गरेको थिए । भने आडजोन केन्द्रीय उपाध्यक्ष केशव भूलले स्वागत मन्तब्य राखेका थिए ।