राँझा : बाँकेमा कोरोना भाइरस सङ्क्रमण बढ्दै गएपछि नेपालगञ्ज मेडिकल कलेजले शिक्षण अस्पताल कोहलपुरमा कोभिड सघन उपचार कक्ष र आइसोलेशन सञ्चालनमा ल्याएको छ ।  कोरोना सङ्क्रमणको दर र मृत्युुदर तीव्ररुपमा बढ्दै गएको अवस्थालाई मध्यनजर गर्दै शिक्षण अस्पताल कोहलपुरमा १५ श्ययाको सघन उपचार कक्ष तथा ३० श्यया क्षमताको आइसोलेशन वार्ड सञ्चालनमा ल्याएको अस्पतालका सहायक निर्देशक डा नितेशकुमार कनोडियाले जानकारी दिए ।     
     
 उहाँका अनुसार, कोरोना भाइरसको पहिलो लहरमा समेत लुम्बिनी प्रदेश, कर्णाली प्रदेश र सुदूरपश्चिम प्रदेशका जनतालाई प्रत्यक्ष सेवा दिएको अस्पतालले कोरोना सङ्क्रमणदर कम भएसँगै कोभिड वार्ड हटाएको थियो ।     
     
उपचाररत एक सङ्क्रमितको मृत्यु     
     
बाँकेको नेपालगञ्जस्थित भेरी अस्पतालमा उपचाररत एक कोरोना सङ्क्रमितको आज बिहान मृत्यु भएको छ । दाङको घोराही उपमहानगरपालिका– ११ नारायणपुर निवासी ३७ वर्षीय सङ्क्रमित महिलाको उपचारका क्रममा भेरी अस्पताल, नेपालगञ्जमा मृत्यु भएको बाँकेका कोरोना स्रोत व्यक्ति तेज वलीले जानकारी दिए ।     
     
उनका अनुसार, स्वास्थ्यमा समस्या देखिएपछि चैत २६ गते कोहलपुर शिक्षण अस्पतालको प्रयोशालामा गरिएको पिसिआर परीक्षणमा कोरोना पुष्टि भएको थियो । कोरोना पुष्टि भएपश्चात् भेरी अस्पतालको कोभिड वार्डमा भर्ना गरी उपचार गर्दा गर्दै आज बिहान १ बजेर २७ मिनेटमा मृत्यु भएको हो ।