काठमाडौं : पछिल्लो समय  नेपालीहरुमाझ लोकप्रिय बनेको फुलबुट्टे सारी गीत संस्कृत भर्सनमा पनि सार्वजनिक भएको छ ।  केएन स्वामी अफिसियल’ नामक युट्युव च्यानलबाट उक्त गीतको संस्कृत भर्सन सार्वजनिक गरिएको हो। विभिन्न भर्सनमा मात्र नभई विभिन्न भाषामा सार्वजनिक भैरहेको चर्चित गीत ‘फुलबुट्टे सारी’ लाई केएन स्वामीले गीतका शब्दलाई संस्कृतमा अनुवाद गरेका छन् भने जागरण घिमिरेले संस्कृत भर्सनमा गाएका छन्।

हाल उक्त गीत मेल भर्सन, फिमेल भर्सन, चाइल्ड भर्सन र लेजेन्डरी भर्सनमा ‘अफिसियल्ली’ नै आइसकेको छ। मेल भर्सन मार्मिक लामाको स्वरमा रहेको छ भने फिमेल भर्सन मिलन नेवार, चाइल्ड भर्सन अरिष्मा सिवाकोटी र लेजेन्डरी भर्सन मदनकृष्ण श्रेष्ठको स्वरमा रहेको छ। उक्त गीत ‘देवीथान म्युजिक’ नामक युट्युब च्यानलबाट ‘अफिसियल्ली’ सार्वजनिक गरिएको छ।

पछिल्लो समय ‘फुलबुट्टे सारी’का अन्य भर्सनसमेत सार्वजनिक भएका छन्। युगाण्डाकी बियोन्से फामासीले ‘फुलबुट्टे सारी’को अफ्रिकन भर्सन गाएकी छन् भने लक्की सिद्धुले पञ्जावी भर्सन गाएका छन्।