काठमाडाैंः कार दुर्घटना हुँदा एक जनाकाे ज्यान गएकाे छ। शुक्रबार बिहान करिब साढे ६ बजे पेप्सीकाेलामा कार अनियन्त्रित भइ दुर्घटना हुँदा तीनकुने निवासी २१ वर्षीय दितम गुभाजुकाे निधन भएकाे हाे। 

बिहान दुर्घटना हुनासाथ गम्भीर घाइते भएका उनलाई उपचारका लागि ट्रमा सेन्टर लगिए पनि चिकित्सकले मृत घोषणा गरेका थिए।

प्रहरीका अनुसार गुभाजुसहित अन्य ७ जना सवार बा१०च २८६४ नम्बरको कार मुलपानीबाट जडिबुटीतिर आउँदै गर्दा पेप्सीकोलामा रहेकाे काठमाडौं–३२ वडा कार्यालय अगाडिकाे रेलिङमा ठोक्किएर दुर्घटना भएको हो।

दुर्घटनाका अन्य घाइतेकाे अवस्था सामान्य रहेकाे प्रहरी वृत्त, बानेश्वरका डीएसपी दक्षबहादुर बस्नेतले बताए। कारका चालक २० वर्षीय वीरेन्द्रराज श्रेष्ठलाई प्रहरीले नियन्त्रणमा लिएको छ।

मृतक गुभाजुसहित अन्य ७ जना बिहीबार राति जन्मदिन मनाएर फर्किएका थिए। घटनाबारे थप अनुसन्धान भइरहेकाे बताइएकाे छ।