काठमाडाैंः स्थानीय र पश्चिमी वायुको प्रभावका कारण आज बुधबारसहित अझै केही दिन माैसम बदली हुने मौसम पूर्वानुमान महाशाखाले जनाएको छ।

बुधबार दिउँसो र राति गण्डकी, कर्णाली र सुदूरपश्चिम प्रदेशका केही स्थानमा र देशका अन्य पहाडी भूभागका एक/दुई स्थानमा मेघ गर्जन र चट्याङसहित वर्षा हुने संभावना रहेकाे महाशाखाको अनुमान छ।

महाशाखाका अनुसार बिहीबार र शुक्रबार पनि पहाडी भूभागका केही ठाउँमा मेघ गर्जन र चट्याङसहित हल्का वर्षा हुनेछ।

महाशाखाले आज देशका केही भूभागमा मेघगर्जन र चट्याङकाे सम्भावना रहेकोले आवश्यक सतर्कता अपनाउनसमेत आग्रह गरेकाे छ।