डाेल्पाः समुन्द्री सतहबाट तीन हजार पाँच सय ८९ मिटरकाे उचाईमा रहेकाे शे–फोक्सुण्डो तालमा निःशुल्क इन्टरनेट सेवा जडान भएकाे छ।

शे–फोक्सुण्डो गाउँपालिका–८ मा पर्ने ताल क्षेत्रमा निजी इन्टरनेट सेवा प्रदायक कम्पनी वर्ल्ड लिङ्कले निःशुल्क इन्टरनेट सेवा जडान गरेकाे हाे। 

सुन्दर पर्यटकीय गन्तव्य भएर पनि फोक्सुण्डो ताल ओझेलमा परेकाले थोरै भए पनि प्रसार–प्रसार होस् भन्ने हेतुले ताल नजिकै इन्टरनेट सेवा जडान गरिएको वर्ल्ड लिङ्कले जनाएको छ।

इन्टरनेट प्रयोग गर्ने व्यक्तिले एक दिनमा निःशुल्क ५०० एमबी प्रयोग गर्नसक्ने कम्पनीका प्राविधिक उमाकान्त क्षेत्रीले जानकारी दिए। इन्टरनेट जडानसँगै फोक्सुण्डो ताल घुम्न आउने पर्यटकका लागि सञ्चार सम्पर्कमा रहन सहज हुनाका साथै पर्यटकले मनोरञ्जन लिनसक्ने क्षेत्रीको भनाइ छ।