सर्लाहीः जिल्लाकाे लालबन्दी नगरपालिकाबाट मात्रै विगत तीन महिनामा ११ कराेड रूपैयाँभन्दा बढीकाे गाेलभेँडा देशका विभिन्न स्थानमा निकासी भएकाे छ। गाेलभेँडाकाे शहरकाे रूपमा चिनिने लालबन्दी नगरपालिकाकाे लगभग ८० प्रतिशतभन्दा बढी जमिनमा गाेलभेँडा खेती गरिँदै आएकाे छ। 

गोलभेँडाबाटै मनग्य आम्दानी हुन थालेपछि यस क्षेत्रका बासिन्दाले अन्नबाली छाडेर गोलभेँडाखेती गर्दै आएका छन्। कृषि उपज बजार व्यवस्थापन समिति लालबन्दीबाट मात्र मङ्सिरदेखि माघसम्मकाे तीन महिनामा रू ११ करोड २८ लाख ४४ हजार ५०० को गोलभेँडा निकासी भएको हाे।

लालबन्दी बजारबाट मात्र तीन महिनाको अवधिमा व्यापारीले किसानसँग ५६ लाख ७१ हजार १०० केजी गोलभेँडा खरीद गरेर निर्यात गरेका छन्। माघ महिनामा मात्र लालबन्दी बजारबाट ३८ लाख ७८ हजार ५०० केजी अर्थात् रू ६ करोड २० लाख ५६ हजार बराबरको गोलभेँडा किसानसँग खरीद गरेर व्यापारीहरुले निर्यात गरेको कृषि उपज बजार व्यवस्थापन समितिका अध्यक्ष रामदरेश चौधरीले जानकारी दिए।

मङ्सिर महिनामा किसानले गोलभेँडाको प्रतिकेजी न्यूनतम रू ४५ देखि ६० सम्म पाउने गर्दछन् भने पुसमा रू १० देखि अधिकतम ३५ मा किनबेच हुने गर्दछ। फागुन लागेदेखि भने किसानले प्रतिकेजी अधिकतम रू १५ सम्ममात्र पाउने गर्दछन् ।

माघमा गोलभेँडा प्रतिकेजी रु १२ देखि २० मा किनबेच भएको थियाे।

गर्मी अत्यधिक बढ्दै गएपछि गोलभेँडा उत्पादन बढ्ने भएकाले किसानले फागुन लागेसँगै मूल्य भने अत्यन्त कम पाउने गरेका छन्। सर्लाहीबाट बाहिर निकासी हुने र जिल्लामै खपत हुने गोलभेँडाको मात्र गत विगत वर्षहरुमा एक याममा रू ३५ करोड हाराहारीमा कारोवार हुने गरेको थियो। यस वर्ष भने केही घटी हुने बताइएको छ।

जिल्ला कृषि विकास कार्यालयका अनुसार जिल्लाको उत्तरी क्षेत्रस्थित ईश्वरपुर, लालबन्दी, हरिवन, हरिपुर र वाग्मती नगरपालिका क्षेत्रका दुई हजार हेक्टरभन्दा बढी क्षेत्रफलमा गोलभेँडा खेती हुने गर्दछ। 

यसैगरी विगत तीन महिनामा सर्लाहीमा रू १५ करोडभन्दा बढीको गोलभेँडा उत्पादन भएको छ। जिल्लाकै नवलपुर, सासापुर, हरिवनलगायत बजारबाट देशका विभिन्न शहरमा निकासी हुने भएको तथा जिल्लाभित्रै आन्तरिक खपतको परिमाण अनुमान गर्ने हो भने यो तीन महिनामा रू १५ करोडभन्दा बढीको गोलभेँडा सर्लाहीमा उत्पादन भएको जानकारहरु बताउँछन्।