प्रेमको उपहारस्वरुप तिमीले 
मेरो मुटु मागेपछी 
भागेको हुँ म तिमीबाट 

नभागौँ पनि म कसरी ? 
मुटुजस्तो मुटु नरहे पछि 
मस्तिष्क बाध्य छ 
प्रेमको सतही भाषा बुझ्न अनि बुझाउन 

जसरी खुकुलो माटो बर्षाले चुट्दाचुट्दै ढुङ्गा बन्दछ
त्यसरी नै विभेदको असिनाले चुटेर यो मुटु 
कतिबेला ढुङ्गा बनिसकेछ पत्तै भएन 

मेरो भन्दा फरक मुटु तिमीसँग छ
तब त बुझ्दैनौ मेरो पीडा 
र मागिरहनेछौ कि यो मुटु भनेर
टाढिएको हुँ म तिमीसँग । 

-ईश्वरा सिवा