कञ्चनपुर- भीमदत्त नगरपालिका–९ मटैनामा रहेको बैजनाथ माध्यमिक विद्यालयका प्रद्यानाध्यापक खड्कसिंह विष्ट पक्राउ परेका छन्। 

जिल्ला प्रहरी कार्यालय कञ्चनपुरका प्रहरी नायब उपरीक्षक अमरबहादुर थापाले छात्रामाथि कुटपिट गरेका प्रअलाई नियन्त्रणमा लिएर घटनाबारे अनुसन्धान भइरहेको जानकारी दिए।कक्षा ९ मा अध्ययनरत छात्रा मनिका नाथलाई सोमबार उनले कुटपिट गरेका थिए।

छात्राका बुवा पदम नाथले विद्यालय गएकी छोरीमाथि प्रधानाध्यापक विष्टले कुटपिट गरी घाइते बनाएको बताए। ‘छोरी विद्यालय गएकी थिइन्’, उनले भने, ‘घर आउँदा बेहोस भइन्। अस्पताल ल्याएका छौँ, टाउकामा चोट लागेको छ।’

घटनाबारे विद्यार्थी सङ्घसङ्गठन, महिला अधिकारकर्मी लगायतले विरोध जनाएका छन्। उनीहरूले घटनाको सत्यतथ्य छानबिन गरी दोषीउपर कारवाहीको माग अघि सारेका छन्। 

अनेरास्ववियू कञ्चनपुरका नेता रमेश पन्तले घटना दुःखद् भएको भन्दै प्रअमाथि कारवाहीको माग गरे। महिला अधिकारकर्मी शारदा चन्द, मीना भण्डारी र निर्मला भट्टसहितका अधिकारकर्मीले महिला, बालबालिकामाथि भइरहेका घटनाको भत्र्सना गर्दै दोषीउपर कारवाहीको माग गरेका छन्।