चितवनः जिल्लाकाे कालिका नगरपालिकामा भएको मोटरसाइकल दुर्घटनामा एक जनाको निधन भएको छ। अर्का एक जना घाइते भएका छन्।

जिल्ला प्रहरी कार्यालय चितवनका अनुसार उपरदाङ्गगढीबाट शक्तिखोरतर्फ आउँदै गरेको ना ३६ प २१९९ नम्बरको मोटरसाइकल कालिका–९ सुनखानीमा आफैँ अनियन्त्रित भई दुर्घटना भएको थियो। मोटरसाइकल मङ्गलबार राति १०ः१० बजे सडकबाट ५० मिटर तल खसेको प्रहरीले जनाएको छ।

दुर्घटनामा परी निधन हुनेमा इच्छाकामना गाउँपालिका–२ बस्ने ६० वर्षीया हस्तमाया मगर रहेको कार्यालयका प्रवक्ता सूर्यबहादुर थापाले जानकारी दिए। मगरको घटनास्थलमै निधन भएको हो।

मोटरसाइकल चालक रत्ननगर नगरपालिका–११ बस्ने ३५ वर्षीय फत्तेबहादुर मगर घाइते भएका छन्। घाइते मगरको दुवै खुट्टा, हात र ढाडमा चोट लागेको छ र चितवन मेडिकल कलेजमा उनकाे उपचार भइरहेको छ। मृतक र घाइते आमा छोरा रहेको प्रहरी प्रवक्ता थापाले जानकारी दिए।