काठमाडौं : उपप्रधानमन्त्री एवं शहरी विकास मन्त्री राजेन्द्र महतोविरुद्ध राज्यविरुद्धको कसुर गरेको भन्दै सर्वोच्च अदालतमा रिट परेको छ । आइतबार अधिवक्ता तुलसीराम पराजुलीले उपप्रधानमन्त्री महतोविरुद्ध रिट दायर गरेका छन् ।  यद्यपि रिट दर्ताकै क्रममा रहेको अधिवक्ता पराजुलीले जानकारी दिए । उनले उक्त रिटमा तत्काल मन्त्री पदबाट बर्खास्त गरी ५ वर्षसम्म कैद र ५०  हजार रुपैयाँसम्म जरिवाना गर्न माग गर्दै रिट दायर गरेको बताए । 

उनले भने्, उपप्रधानमन्त्री एवं शहरी विकास मन्त्री राजेन्द्र महताले  मुलुकी अपराध संहिता २०७४ को दफा ४९ ९४० बमोजिम राज्यविरुद्धको कसुर गरेको आधारमा विपक्षी राजेन्द्र महतोलार्इ तत्काल मन्त्री पदबाट बर्खास्त गरी ५ वर्षसम्म कैद र ५०  हजार रुपैयाँ सम्म जरिवाना सजाय माग गर्दै सर्वोच्च अदालतमा रिट दायर गरेको छु रिट दर्ताको क्रममा छ ।  

उपप्रधानमन्त्री महतोले शुक्रबार राति सपथ ग्रहण लगत्तै मन्त्रालयको कार्यभार सम्हाल्दै नेपाललाई बहुल राष्ट्रिय राज्य बनाउनुपर्छ भन्दै सार्वजनिक अभिव्यक्ति दिएका थिए । महतोले सोही भनाई शनिबार दिउँसो पनि दोहो्याएका थिए ।  यद्यपि चर्को आलोचनापछि शनिबार मध्यराति नै उक्त भनाई फिर्ता लिएको भन्दै विज्ञप्ति जारी गरिसकेका छन् ।