सुनसरीः जिल्लाकाे बर्जु गाउँपालिका–६ चिमडीमा बिहीबार साँझ आगलागी हुँदा सात परिवारकाे ११ घर जलेर नष्ट भएकाे छ। स्थानीय प्रभु ऋषिदेवको घरमा रहेको विद्युतीय मिटरबाट लाइन चुहिएर आगलागी हुँदा क्षति भएको जिल्ला प्रहरी कार्यालय सुनसरीले जनाएको छ।

आगलागीबाट करिब रू २० लाखको क्षति भएको छ। आगलागीमा परेर स्थानीय प्रभु ऋषिदेव, चोकी ऋषिदेव, विजय ऋषिदेव, सञ्जय ऋषिदेव, बाबुराम ऋषिदेव, लक्ष्मण ऋषिदेव र लवदिया ऋषिदेव गरेर सात परिवारको ११ घर जलेर पूर्णरूपले नष्ट भएको हाे।

आगलागीमा स्थानीयवासीको घर, घरभित्र रहेका अन्नपात, लत्ताकपडा फर्निचरका सामग्री जलेर नष्ट हुँदा सो बराबरको क्षति भएको हाे। स्थानीयवासी, प्रहरी र विभिन्न ठाउँबाट आएका वारुणयन्त्रको सहयोगमा आगो निभाइएको प्रनाउ कार्कीले बताए।

सदा समुदायको बसोबास रहेको बस्तीमा आगोले सबै थोक खरानी बनाइदिएपछि उनीहरू खुला अकाशमा बस्न बाध्य भएका छन्।