कञ्चनपुरः जिल्लाकाे भीमदत्त नगरपालिकामा गएराति आगलागी भएकाे छ। नगरपालिकाकाे वडा नम्बर १८ मा रहेको प्रिन्स रेष्टुराँ एण्ड लजमा आगलागी हुँदा रू पाँच लाखभन्दा बढीको क्षति भएको हाे।

स्थानीय लालबहादुर थापाले सञ्चालन गर्दै आएकाे रेष्टुराँमा बालिएकाे अगरबत्तीबाट गएराति आगलागी भएको हो। आगलागीबाट होटलमा राखिएको मदिरा, पेय पदार्थ, टिभी, फ्रिज, फर्निचर, इन्भर्टरलगायत सामग्री जलेर नष्ट भएको थापाले बताए।

राति ९ः३० बजे होटल बन्द गरेर घर हिँडेका थापाले राति ११ बजे आगलागी भएको खबर पाएका थिए।

स्थानीय बासिन्दा र दमकलको सहयोगमा आगो नियन्त्रणमा लिइएको जिल्ला प्रहरी कार्यालय कञ्चनपुरले जनाएको छ।