मोरङ : विराटनगरमा आफ्नै दाजुको हत्या गरेको आरोपमा एक युवक पक्राउ परेका छन् । विराटनगर महानगरपालिका ५ पृथ्वी चोक बस्ने ४२ वर्षीय भोला सिंहलाई चक्कु प्रहार गरी हत्या गरेको अभियोगमा उनकै भाइ ३१ वर्षीय साजन सिंहलाई शुक्रबार राति प्रहरीले पक्राउ गरेको हो ।

जिल्ला प्रहरी कार्यालय मोरङबाट खटिएको प्रहरीले उनलाई पक्राउ गरेको हो । गम्भीर घाइते भोलाको विराट अस्पताल विराटनगरमा उपचारको क्रममा मृत्यु भएको हो । साजनमाथि कर्तव्य ज्यान मुद्दामा थप अनुसन्धान भैरहेको प्रहरीले जनाएको छ ।