काठमाडौंः मृत अवस्थामा भेटिएकी सन्तोषी सुब्बाको हत्या अभियोगमा आज प्रहरीले एक जना युवकलाई पक्राउ गरेकाे छ। सिन्धुपाल्चोक स्थायी ठेगाना भएका २९ वर्षीय सुरेश तिमल्सिनालाई पक्राउ गरिएको महानगरीय अपराध महाशाखाले जनाएको छ। 

मङ्गलबार दक्षिणकालीमा सुब्बाकाे शव फेला परेपछि प्रहरीले हत्या भएकाे निश्कर्ष निकाल्दै अनुसन्धान थालेकाे थियाे। प्रहरीले आज दिउँसाे पत्रकार सम्मेलन गरेर उनलाई सार्वजनिक गर्ने तयारी गरेको छ। 

पक्राउ परेका युवक दक्षिणकालीस्थित एक वर्कशपमा काम गर्दै आएका थिए। सुरेश र सन्तोषी दक्षिणकाली मन्दिर क्षेत्रमा दिनभर सँगै बसेकाे र पछि हत्या गरेर सुरेश भने बल्खुतर्फ आएका थिए।

विभिन्न पशुपंछीको आवाज निकालेर युट्युबमा भाइरल बनेकी सन्ताेषीकाे हत्या भारी वस्तुले हिर्काएर गरेकाे प्रहरीकाे भनाई छ। प्रहरीले उनकाे अनुहार क्षतविक्षत भएको अवस्थामा शव फेला पारेको थियाे।