झापाः पछिल्लो २४ घण्टाभित्रमा दमकस्थित लाइफलाइन अस्पतालमा तीन जना सङ्क्रमितको ज्यान गएको छ। अस्पातलका कोभिड फोकल पर्सन डम्बर मोतेका अनुसार आज बिहान साढे ४ः०० बजे मोरङको उर्लाबारी–१ का ५२ वर्षीय पुरुषको निधन भएसँगै पछिल्लाे २४ घण्टामा तीन जनाकाे निधन भएकाे हाे।

यसअघि बिहीबार दिउँसो साढे ४ः०० बजे पथरीशनिश्चरे–१० का ७० वर्षीय पुरुष र बिहान साढे ८ः०० बजे दमक–८ की ७० वर्षीया एक वृद्धाको उपचारका क्रममा सोही अस्पतालमा निधन भएको थियो। सो अस्पतालमा आज बिहानसम्म २५ कोरोना सङ्क्रमित उपचाररत रहेका छन्।

गत वैशाख १० गते यता सो अस्पतालमा मात्रै कूल नौ सङ्क्रमितको निधन भएको अस्पतालले जनाएको छ। अस्पतालमा कूल ७९ सङ्क्रमित उपचारका लागि भर्ना भएका, १५ जनालाई अन्यत्र रेफर गरिएको छ भने २२ जना उपचारपछि निको भएका कोभिड फोकल पर्सन मोतेले बताए।