काठमाडाैंः नेपाली राष्ट्रिय क्रिकेट टाेलीका पूर्व कप्तान पारस खड्काले त्रिदेशीय कप क्रिकेट प्रतियाेगिता खेल्न नपाउने भएका छन्। भाेलि शनिबारदेखि शुरु हुने त्रिदेशिय कपकाे पहिलाे खेल नेपाल र नेदरल्याण्डसबीच दिउँसाे १ः१५ बाट शुरु हुँदै छ। 

पारसलाई केही दिनअघि प्रशिक्षणकाे क्रममा दाहिने काँधमा चाेट लागेकाे थियाे। साेही चाेटका कारण उनले खेल गुमाउने भएका हुन्। चिकित्सकले उनलाई तीन साता आराम गर्न सुझाएअनुसार उनले बिहीबार नै टाेली बसेकाे होटल क्राउन प्लाजा छाडेका थिए।

कीर्तिपुरस्थित त्रिवि अन्तर्राष्ट्रिय क्रिकेट मैदानमा नेपाल, नेदरल्यान्ड्स र मलेसियबीच त्रिदेशिय टी–ट्वान्टी सिरिज हुँदै छ। पारसकाे स्थानमा कसलाई राख्ने भन्नेबारे क्यानले हालसम्म निर्णय लिइसकेकाे छैन।