काठमाडौं । ’विप्लप’ नेतृत्वको नेपाल कम्युनिस्ट पार्टीनिकट अखिल (क्रान्तिकारी)ले पेट्रोलियम पदार्थको मूल्यवृद्धिविरुद्ध प्रदर्शन गरेको छ । क्रान्तिकारीले प्रदर्शनीमार्गस्थित रत्नराज्य(आरआर) क्याम्पस अगाडि विरोध प्रदर्शन गरेको हो । 

प्रदर्शनका क्रममा उनीहरुले टायर बालेर नाराबाजी गरेका थिए । मूल्यवृद्धि तत्काल फिर्ता लिनुपर्ने माग उनीहरुले अगाडि सारेका छन् । प्रदर्शनकारीले टायर बालेपछि प्रहरीले हस्तक्षेप गरेर नियन्त्रणमा लिएको थियो।

त्यसक्रममा सामान्य झडपसमेत भएको थियो । नेपाल आयल निगमले बुधबार रातिबाट लागू हुनेगरी पेट्रोलियम पदार्थको मूल्यवृद्धि गरेपछि विभिन्न विद्यार्थी संगठनहरुले विरोध प्रदर्शन गर्दै आएका छन् ।