मकवानपुरः प्रहरीले श्रीमतीकाे हत्या गरेकाे आरोपमा एक जनालाई पक्राउ गरेको छ। ४२ वर्षीया श्रीमती सुनिता थापामगरलाई  कुटपिट गरी हत्या गरेको भन्दै प्रहरीले बारा निजगढ घर भई हेटौँडा बस्ने ५४ वर्षीय कृष्णबहादुर मोक्तानलाई सोमबार हेटौँडा–८ कमानेबाट पक्राउ गरेको हो।

प्रहरीका अनुसार जेठ ९ गते दिउँसो हेटौँडा–१० न्यूरेनीस्थित भुटनदेवी सामुदायिक वनमा बेवारिसे अवस्थामा महिलाको शव फेला परेपछि साे घटनाको अनुसन्धानका क्रममा शव मगरको रहेको पहिचान खुलेको थियो। पहिचान खुलेपछि प्रारम्भिक अनुसन्धानमा उनकै श्रीमानले हत्या गरेकाे खुलेपछि प्रहरीले माेक्तानलाई पक्राउ गरेकाे हाे।

बारा जिल्ला निजगढ नगरपालिकाअन्तर्गत रामथली घर भई हाल हेटौँडा–१० बस्ने ५४ वर्षीय माइला भनिने कृष्णबहादुर मोक्तानले टहराभित्र वादविवाद हुँदा श्रीमती कुटपिट गरेको र नजिकैको न्यूरेनीस्थित भूटनदेवी सामुदायिक वनमा लगी फालेको खुल्न आएको प्रहरीले जनाएको छ।

मोक्तानलाई प्रहरीले सोमबार सार्वजनिक गरेको छ। घटनाका बारेमा थप अनुसन्धान भइरहेको प्रहरीले जनाएको छ।