सुर्खेतः जिल्लाकाे बराहताल गाउँपालिकाको सिस्नेरी बस्तीमा आगलागीमा परी नौ घर जलेर नष्ट भएका छन्। बराहताल–९ मा रहेको सिस्नेरी बस्तीमा बिहीबार अपराह्न चार बजेतिर आगलागी भएको हो।

नाैमध्ये आठ घर पूर्णरूपमा जलेर नष्ट भएको छ भने एउटा आशिंकरूपमा जलेको वडाध्यक्ष युवराज कार्कीले जानकारी दिए। उनकाअनुसार हरियाली सामुदायिक वनमा लागेको आगो बस्तीमा सल्किएको हो। “बस्तीबाट नजिकै रहेको वनमा लागेको आगोले सिधै बस्तीमा भेट्टाउँदा घर जलेका हुन्”, वडाध्यक्ष कार्कीले भने, “प्रहरी र स्थानीयवासी खटिएपछि अहिले आगो निभाइएको छ।”

सिस्नेरी गाउँमा झण्डै १८ घरधुरी छन्। आगलागी पीडितहरूलाई तत्कालका लागि खाद्यान्न वितरण गरिएको वडाध्यक्ष कार्कीले जानकारी दिए।