स्याङ्गजाः जिल्लाकाे गल्याङ नगरपालिकामा ट्र्याक्टर दुर्घटनामा घाइते भएका सहचालकलाई साेही ट्रयाक्टरका चालक र अर्का सहचालक मिलेर कालीगण्डकीमा बगाएका छन्। नगरपालिकाकाे बेल्चौर-साँखर कच्ची सडक खण्डमा गुडिरहेको लु अ फ १०२० (अस्थायी) नम्बरकाे ट्र्याक्टरबाट खसेर घाइते भएका सहचालक गणेश गाहालाई उनकै साथीहरूले कालीगण्डकीमा बगाएकाे जिल्ला प्रहरी कार्यालय स्याङ्गजाले जनाएकाे छ। 

घाइते गाहालाई ट्रयाक्टर चालक अमित परियार र सोही ट्र्याक्टरका अर्का सहचालक गल्याङ नगरपालिका ८ का २२ वर्षीय सुनिल रानाले कालीगण्डकीमा लगेर फालेको प्रहरी प्रवक्ता राजेन्द्रप्रसाद अधिकारीले बताए। घटना राति १० बजे भएको प्रहरीले बताएकाे छ।

घटना भएको जानकारी पाउन साथ प्रहरीकाे टोलीले कालीगण्डकी नदीमा खोजी शुरु गरे पनि अझै लास फेला पर्न सकेको छैन। बेपत्ता गाहाको खोजतलास गर्न गोताखोर टोली ल्याउने तयारी भइरहेको प्रवक्ता अधिकारीले जानकारी दिए।

घटनामा संलग्न अर्का सहचालक सुनिल रानालाई अनुसन्धानका लागि प्रहरीले पक्राउ गरेको छ (माथि तस्बिरमा)। रानाले यस घटनाबारे आफ्नो दिदीलाई जानकारी दिएपछि घटना बाहिर आएको हो।

रानालाई प्रहरीले कर्तव्य ज्यान मुद्दा दर्ता गरी सोमबार जिल्ला अदालत स्याङ्गजामा सात दिनको म्याद थप गरी अनुसन्धान भइरहेकाे छ। 

चैत ५ गते घटना भएपछि चालक अमित र सहचालक सुनिल दुवै ट्रयाक्टर छाडेर भागेका थिए। फरार रहेका ट्र्याक्टर चालक अमित परियारको खोजी कार्य भइरहेको र ट्र्याक्टर नियन्त्रणमा लिइएको प्रहरीले बताएकाे छ।