सप्तरीः जिल्लाकाे अग्निसाइर कृष्णासवरण गाउँपालिका–५ स्थित कृषि फार्ममा आगलागी हुँदा २० गाई जलेर मरेका छन्। स्थानीय मनाेजकुमार साहले सञ्चालन गरेकाे कृष्णाराम बहुउद्देश्यीय कृषि फार्ममा विद्युत् सर्ट भएर आगलागी भएकाे हाे।

कृषि फार्ममा ६० गाई थिए। इलाका प्रहरी कार्यालय कञ्चनपुरका अनुसार तीमध्ये १० गाई घाइते र ३० हराइरहेका छन् भने २० गाई जलेर मरेका छन्।

आगलागीले फार्मको घरसहित गाईलाई खुवाइने अन्नपातसमेत जल्दा करीब रू ५० लाख बराबरको क्षति भएको पीडित साहले बताए।

यस्तै आगो निभाउने क्रममा फार्मका अर्का सञ्चालक दीनानाथ साह घाइते भएका छन्। स्थानीय अस्पतालमा उनकाे उपचार भइरहेको प्रहरीले जनाएको छ।