काठमाडाैंः तीनकुनेमा बन्ने भनिएकाे बागमती पुल निर्माणकाे टुंगाे नलाग्दा अलपत्र परेकाे छ। नयाँ ठेक्कामार्फत निर्माण गरिने भनिए पनि प्रक्रिया अझै अघि बढेको छैन।

निर्माण कम्पनी पप्पु कन्सट्रक्सन प्रालीले लामाे समयसम्म काम अघि नबढाएपछि गत वर्ष सडक विभागले पुल निर्माणकाे ठेक्का तोडेकाे थियाे। यद्यपि नयाँ ठेक्कामा जान बाँकी नै रहेको काठमाडौँ उपत्यका सडक बिस्तार आयोजनाले जनाएको छ।

पुल निर्माणकाे लागत अनुमानको काम सडक विभागले गर्न बाँकी रहेको र विभागबाट लागत अनुमान आएपछि नयाँ ठेक्काका लागि प्रक्रिया शुरु हुने आयोजनाका प्रमुख गुरु अधिकारीले बताए।

निर्माण व्यवसायीको लापरवाहीका कारण सो पुल धेरै वर्षदेखि अलपत्र भएकाे छ। सो पुल यसअघि निर्माण कम्पनी आफैँले डिजाइन गर्नेगरी (डिजाइन एण्ड बिल्ड) सम्झौताका आधारमा निर्माण शुरु गरिएको थियो। साेही अनुरुप पहिले कम्पनीले तयार गरेको ढाँचामा नै पुल निर्माण गरिने छ।

काम गर्न आवश्यक रकम पेश्की (मोबाइलाइजेसन) पहिले कम्पनीलाई उपलब्ध गराइएकामा त्यो फिर्ता भइसकेको छ। नयाँ ठेक्का सम्झौतामा गएपछि पनि निर्माणका लागि साढे दुईदेखि तीन वर्ष लाग्ने आयोजनाले जनाएको छ। 

०७१ सालकाे पुसमा सडक विभागले सो कम्पनीसँग साढे तीन वर्षमा निर्माण सम्पन्न गर्ने गरी ठेक्का सम्झौता गरेको थियो। आयोजनाले ०७१ सालमै सो पुलसँगै बिजुलीबजारस्थित धोबीखोला पुल निर्माणका लागि ठेक्का सम्झौता गरेको थियो। मुख्य सडकका दायाँबायाँ दुई÷दुई पुल निर्माण गर्न एउटै निर्माण कम्पनीसँग सम्झौता भएको थियो। बिजुलीबजारस्थित पुल निर्माण सम्पन्न भएर गत वर्षदेखि नै प्रयोगमा आइसके पनि सो पुल निर्माण अघि बढ्न सकेको छैन। 

यसअघि रू २१ करोड ३३ हजार बजेटमा निर्माण सम्पन्न गर्ने गरी ठेक्का भएको थियो। नेपालमा पहिलोपटक नयाँ प्रविधि (आर्स एण्ड ब्रिज) बाट सो पुल निर्माण गरिने गरी सम्झौता भएको थियो। अरू सामान्य पुलमा तल्लो भागमा भार भए पनि यसमा भार माथिल्लो भागमा पर्ने विभागले जनाएको छ।

पुल साँघुरो भएकाले तिनकुने क्षेत्रमा सवारी चाप बढी हुँदा चालक र यात्रु हैरान छन्।