पोखरा : कास्कीको अन्नपूर्ण गाउँपालिका–१० स्थित घान्द्रुक नजिकै जिप दुर्घटना हुँदा ८ जनाको मृत्यु भएको छ । दुर्घटनामा एक जना घाइते भएका छन् । पोखराको नयाँपुलबाट घान्द्रुकतर्फ जाँदै गरेको ग१ज ६९०० नम्बरको जिप दुर्घटना भएको हो ।

दुर्घटनामा ८ जनाको घटनास्थलमै ज्यान गएको जिल्ला प्रहरी कार्यालय कास्कीका प्रहरी प्रमुख एसपी रमेश थापाले जानकारी दिए । प्रहरीका अनुसार मृतकको शव पोखरा ल्याइँदै छ ।

दुर्घटनाको कारण र मृतकको परिचय भने खुलिसकेको छैन । जिप सडकबाट १५० मिटर तल खसेको छ ।