कास्कीः पोखरा–बाग्लुङ सडकखण्डमा टिपर र माेटरसाइकल एकापसमा ठाेक्किँदा माेटरसाइकल सवार दुई जनाको निधन भएको छ। पर्वतको भुकताङले बस्ने ३२ वर्षीय विनोद मल्ल र अर्का परिचय खुल्न बाँकी अन्दाजी ४४/४५ वर्षीय पुरुषको निधन भएकाे जिल्ला प्रहरी कार्यालय कास्कीले जनाएको छ।

पर्वतबाट पोखरातर्फ आउँदै गरेको प्रदेश नं ३–०१–००३ क ५१७३ नम्बरको टिपर र पोखराबाट पर्वत जाँदै गरेको ग२०प ६०३० नम्बरको मोटरसाइकल आइतबार साँझ कास्कीको अन्नपूर्ण गाउँपालिका–३ स्थित पोखरा–बाग्लुङ सडकखण्डको लक्ष्मीदेउराली पत्थरढुङ्गामा एकापसमा ठक्कर खाँदा दुर्घटना भएको जिल्ला प्रहरी नायब उपरीक्षक सुवास हमालले जानकारी दिए।

दुर्घटनामा गम्भीर घाइते मोटरसाइकलमा सवार दुवैजनालाई उपचारका लागि पोखरा ल्याइएकोमा उपचारका क्रममा निधन भएको प्रहरीले जनाएको छ। टिपर चालक सिन्धुपाल्चोक इन्द्रावती गाउँपालिका–१० बस्ने २५ वर्षीय सुरेश माझी र दुवै सवारी साधनलाई नियन्त्रणमा लिइएको र घटनाको अनुसन्धान भइरहेको प्रनाउ हमालले जानकारी दिनुभयो।