काठमाडाैंः गत मे महिनामा त्रिभुवन अन्तरराष्ट्रिय विमानस्थलबाट १२ हजार जना नेपाल भित्रिएका छन्। अध्यागमन विभागले सार्वजनिक गरेको मे महिनाको तथ्याङ्कअनुसार १२ हजार ४०० जना नेपाल भित्रिएका हुन्।

यीमध्ये एक हजार चार सय ६८ विदेशी नागरिक र १० हजार नाै सय ३२ जना नेपाली नागरिक रहेका छन्। गत मेमा नेपाल भित्रनेभन्दा बाहिरिनेको तथ्याङ्क दोब्बर छ। सो अवधिमा २३ हजार एक सय ३५ जना बाहिरिएका छन्। बाहिरिनेमध्ये नौ हजार नाै सय ७७ विदेशी र १३ हजार एक सय ५८ जना नेपाली छन्।

अन्य महिनाको तुलनामा मे महिनामा कम सङ्ख्यामा विदेशी नेपाल भित्रिएका छन्। कोरोना महामारी र लामो समयको बन्दाबन्दीपछि नेपालमा सबैभन्दा धेरै पर्यटक अप्रिलमा नेपाल भित्रिएका थिए। विभागको तथ्याङ्कअनुसार अप्रिलमा एक सय ४४ देशबाट २२ हजार चार सय ५० जना विदेशी नेपाल भित्रिएका थिए।

यस्तै, गत अप्रिलमा त्रिभुवन अन्तरराष्ट्रिय विमानस्थल हुँदै ५१ हजार सात सय ७५ नेपाली विदेशिएका थिए।