सिरहाः जिल्ला प्रहरी कार्यालय सिरहाले प्रहरी सहायक निरीक्षकसहित तीनजना प्रहरी कर्मचारीलाई निलम्बन गरेकाे छ। प्रहरी आचरण विपरित कार्य गरेको भन्दै तीन जनालाई निलम्बन गरी थप कारवाही अघि बढाइएको छ।

निषेधाज्ञाको समयमा लहान नगरपालिका–२३ गढिया चोकस्थित पूजा मदिरा पसलमा होहोल्ला गर्ने व्यक्तिलाई पक्राउ गर्न गएका प्रहरीले नै मदिरा पसलबाट मदिरा चोरेको भन्दै सामाजिक सञ्जालमा फोटो सार्वजनिक भएकाे थियाे। पछि जिल्ला प्रहरी कार्यालयले त्यहाँ गएका तीनैजना प्रहरीलाई निलम्बन गरेको हो।

जिल्ला प्रहरी कार्यालय सिरहाका प्रवक्ता प्रहरी नायब उपरीक्षक शालिग्राम शर्माका अनुसार त्यहाँ काममा खटिएका प्रहरी सहायक निरीक्षक नबलकिशोर ठाकुर, प्रहरी जवानद्वय अन्नुकुमार राय र नरेशकुमार रायलाई निलम्बन गरिएको हाे।

प्रहरीका आचरण विपरीत कार्य गरेको पाइएकाले प्रहरी नियमावली २०७१ बमोजिम तीनैजनालाई निलम्बन गरी थप अनुसन्धान भइरहेको प्रहरी नायब उपरीक्षक शर्माले बताए।