नवलपरासीः पश्चिम नवलपरासीको पूर्वपश्चिम राजमार्गमा पर्ने बर्दघाट नगरपालिकामा बस दुर्घटना भएकाे छ। दुर्घटनामा चार जनाकाे निधन भएकाे छ भने अन्य ४९ जना घाइते भएका छन्। 

आज बुधबार बिहान करिब साढे पाँच बजे बर्दघाट नगरपालिका- ४ स्थित दाउन्ने सडकखण्डको बाँस खोलामा ना५ख २७१३ नम्बरको बस दुर्घटनामा परेको हो। बस सडकबाट एक सय ५० मिटर तल खसेको हो।

जिल्ला प्रहरी कार्यालय नवलपरासीका अनुसार बस काठमाडौंबाट रुकुम पश्चिमका लागि छुटेको थियाे। बसमा ५८ जना यात्रु सवार थिए। मृतक चारमध्ये दुई जनाकाे सनाखत भएकाे छ। प्रहरी नायब उपरिक्षक राजु लामाका अनुसार निधन हुनेमा रुकुम पश्चिमको त्रिवेणीकी २७ वर्षीया कल्पना पुन र रुकुम पूर्व सिस्ने गाउँपालिका घर भएका ३६ वर्षीय धनराज घर्ती रहेका छन्। 

घाइतेमध्ये एकजना बसमै च्यापिएको अवस्थामा रहेकाले क्रेन बोलाएर निकाल्ने प्रयास भईरहेको प्रहरीले जनाएकाे छ। बसलाई रुखले अड्काएका कारण थप मानवीय क्षति हुन नपाएको प्रहरीले जनाएको छ।

दुर्घटनाका गम्भीर घाइतेलाई थप उपचारका लागि बुटवल लगिएको छ। सामान्य घाइतेको बर्दघाटकै स्थानीय अस्पतालमा उपचार भइरहेको छ। बसमा सवार पाँच जना यात्रु सकुसल रहेका छन्। दुर्घटना बारे थप विवरण आउन बाँकी रहेकाे छ।