काठमाडौं : साताको पहिलो दिन आइतबार (आज) सेयर बजार परिसूचक नेप्सेमा उच्च वृद्धि भएको छ साथै कारोबार रकममा समेत उत्साहजनक वृद्धि देखिएको छ । आज नेप्से परिसूचक ५४.२६ अंकले बढेको हो । यो २.०२ प्रतिशतको वृद्धिदर हो ।आइतबार कारोबार रकम १० अर्ब ४० करोड ३८ लाख भएको छ । नेप्से २७३८.३५ अंकमा पुगेर रोकिएको छ ।

त्यस्तै आज ८ वटा कम्पनीको सकारात्मक सर्किट लेभलमा कारोबार भएको छ । आइतबार कुल २१४ कम्पनीको १ लाख १३ हजार ६९ वटा कारोबार भएको हो । यी कारोबारमा कुल २ करोड १४ लाख २८ हजार ८ सय ८२ कित्ता सेयर किनबेच भएको छ ।आज सबैजसो परिसूचक हरियाली भएका छन् । यसमध्ये निर्जिवन बीमा समूहको परिसूचक सबैभन्दा बढी बढ्यो । त्यसपछि क्रमशः विकास बैक, जिवन बीमा, लगानी समुहको परिसूचकमा वृद्धि भएको छ ।

आज रुरु जलविद्यूत आयोजनाको सेयर मूल्यमा १० प्रतिशत वृद्धि भयो । यो कम्पनीका लगानीकर्ताले बढी कमाए ।यसबाहेक शिखर इन्स्यारेन्स, समता घरेलु लघुवित्त वित्तीय संस्था, सप्तकोशी विकास बैंक, प्रोग्रेसिभ फाइनान्स, बरुण हाइड्रोपावर, आइएमई जनरल इन्स्योरेन्स र विशाल बजार कम्पनीका लगानीकर्ताले बढी कमाए । आज बढी गुमाउनेमा भने युनियन हाइड्रोपावर, आँखुखोला जलविद्युत कम्पनी, नारायणी विकास बैंक, घलेम्दी हाइड्रोलगायत रहेका छन् ।