कैलालीः जिल्लाकाे लम्कीचुहा नगरपालिकामा गोली चलेको छ। मंगलबार बिहानै पूर्वपश्चिम राजमार्ग अन्तर्गत लम्की चोकमा ना ६ख ८८३३ नम्बरको बसको ठक्करबाट पैदल यात्री लम्कीचुहा नगरपालिका–१ की २२ वर्षीया कमला देवकोटाको निधन भएसँगै तनावग्रस्त बनेको लम्कीमा स्थिती नियन्त्रणमा लिन प्रहरीले गाेली चलाएकाे हाे। 

गाेली लागेर २ जना घाइते भएका छन भने ती मध्ये एकको अवस्था गम्भिर रहेको छ। गम्भिर घाइतेलाई नेपालगञ्ज रिफर गरिएको प्रहरीले जनाएको छ । 

घाइते हुनेमा लम्कीचुहा नगरपालिका १ का १८ वर्षीय दीपक सन्ज्याल र २५ वर्षीया कृष्ण काफ्ले रहेका छन्।

भीड तितरबितर बनाउन हवाई फायर गरिएको जिल्ला प्रहरी कार्यालय कैलालीका प्रहरी निरीक्षक हिक्मत थापाले बताए। साथै केही सेल अश्रुग्यास समेत प्रहार गरेको प्रहरी निरीक्षक थापाले बताए। 

ठक्कर दिने बसका चालक बर्दगोरिया १ बस्ने पुष्प कँडेललाई नियन्त्रणमा लिएर अनुसन्धान गरिरहेको प्रहरीले जनाएको छ।