एजेन्सी- कुख्यात अपराधी तथा ड्रग डिलर हकिन गुजमान लाेअरा (एल चापाे)की श्रीमती पक्राउ परेकी छिन्। चापाेकी श्रीमती  एमा काेराेनेल एस्पुराेलाई अमेरिकी प्रहरीले मंगलबार भर्जिनियाबाट पक्राउ गरेकाे हाे। उनलाई अन्तराष्ट्रिय ड्रग तस्करीकाे आराेपमा पक्राउ गरिएकाे अन्तराष्ट्रिय सञ्चारमाध्यमहरूले बताएका छन्। 

३१ वर्षीया एमासँग अमेरिका र मेक्सिकाे दुबै देशकाे नागरिकता रहेकाे छ। डलेस अन्तराष्ट्रिय विमानस्थलमा उनलाई पक्राउ गरिएकाे हाे। सिनालाेआ कार्टेलमार्फत लागू औषध वितरण गर्ने एमालाई बुधबार काेलम्बियाकाे जिल्ला अदालतमा भिडियाे कन्फरेन्समार्फत हाजिर गराइने छ।

एस्पुराेलाई पाँच किलाे काेकिन, पाँच सय ग्राम मेथाम्फेटामाइन, एक किलाे हेराेइन र एक हजार किलाे गाँजा जस्ता लागू औषध अमेरिका भित्र्याएकाे आराेपमा मुद्दा लगाइने अमेरिकी प्रहरीले बताएकाे छ। यसका अलावा एस्पुराेले सन् २०१५ मा एल्टिप्लानाे कारागारबाट एल चापाेलाई जेल ब्रेक गराउन मद्दत गरेकाेसमेत आराेप रहेकाे छ। 

एल चापाे हाल अमेरिकाकाे जेलमा जन्मकैदको सजाय काटिरहेका छन्।