बाराः जिल्लाकाे कलैया उपमहानगरपालिकामा दुई जना बालकको घाँटी रेटेर हत्या गरिएको अवस्थामा शव फेला परेकाे छ। हत्या गरिएका बालकद्वय दाजुभाइ हुन्।

उपमहानगरपालिकाकै ७ नम्बर वडाकाे रंगपुर निवासी गफार मियाँका ९ वर्षीय छाेरा उसमान अन्सारी र ७ वर्षीय अमिन अन्सारीकाे हत्या भएकाे हाे। 

जिल्ला प्रहरी कार्यालय बाराका प्रहरी प्रवक्ता डिएसपी गौतम मिश्रका अनुसार धारिलो हतियारले घाँटी रेटेकाे अवस्थामा शव फेला परेको हाे। आज मङ्गलबार बिहान रंगपुरमै निर्माणाधीन मदरसाको कोठाभित्र शव बरामद गरिएकाे प्रहरीले जनाएकाे छ। 

हिजो साँझ करिब ८ बजे बाहिर खेल्न भनि घरबाट निस्केका दुवैजना बालक राति घर फर्किएनन्। बिहान स्थानीयले निर्माणाधीन मदरासामा शव देखेपछि प्रहरीलाई खबर गरेका थिए। 

हत्या भएका बालकका बुवा वैदेशिक रोजगारीको क्रममा कतारमा रहेका छन्। घटनाबारे अनुसन्धान शुरु गरिसकिएकाे प्रहरीले जनाएकाे छ। अनुसन्धानमा तालिमप्राप्त कुकुर परिचालन गरिसकिएको प्रहरी प्रवक्ता डिएसपी मिश्रले बताएका छन्।