महोत्तरीः घाँस काट्न जाँदा बेपत्ता भएकाे जिल्लाको भंगहा नगरपालिकाका सात किशाेरी भारतमा फेला परेका छन्। मङ्गलबार दिउँसाे १ बजे करिब घाँस काट्न भनि घरबाट निस्केका किशाेरीहरू अबेरसम्म घर नफर्किँदा परिवारजनले प्रहरीमा खबर गरेका थिए। 

बेपत्ता किशाेरी हाल भारतको बिहार राज्यकाे सीतामढीमा फेला परेको बताइएकाे छ। भंगहा नगरपालिकाका प्रमुख सन्जीवकुमार साहले प्रहरीलाई सूचना दिएपछि नेपाल प्रहरीको एक टोली किशाेरी उद्धारका लागि सीतामढी प्रस्थान गरेको छ।

महाेत्तरीका प्रमुख जिल्ला अधिकारी तिर्थराज भट्टराईले प्रहरीको टोलीलाई किशाेरीहरूकाे फोटोसहित सीतामढी पठाइएको बताएका छन्। यद्यपि ती किशोरीहरू भँगाहाबाटै हराएका हुन् भन्ने पुष्टि भइसकेकाे छैन। 

नगरपालिकाका प्रमुख सन्जीवकुमार साहले भने सशस्त्र प्रहरीको समन्वयमा भारतीय प्रहरीले किशोरीहरू फेला पारेको बताएका छन्। नगरप्रमुख साहले सीतामढीमा फेला परेका किशाेरीहरूकाे नाम भंगाहाबाट बेपत्ता किशाेरीहरूसँग मिलेकाे आधारमा आफ्नै नेतृत्व टाेली भारततर्फ गइरहेकाे जानकारी दिएका छन्।