गरिबीका कारण पाइलट अध्ययन गर्न नपाएका दिपेन्द्र घिसिङ तामाङले अध्ययनका लागि एक रूपैयाँ संकलन अभियान सञ्चालन गरेका थिए । उनले सर्वसाधारणकै सहयोगबाट पाइलट बन्न सक्छु भनेर रु १ रुपैयाँ संकलन अभियानमा लागेका थिए । कमजोर नै भएपनि लक्ष्य र हिम्मत नहार्ने र जतिनै कठीन समय भएता पनि डटी लड्ने उनले बताएका छन् ।

पाइलट बन्ने लक्ष्य लिएर १–१ रुपैयाँ संकलन गरेका दिपेन्द्र घिसिङलाई ग्लोवल टेलिभिजनले पनि आर्थिक सहयोग गरेको छ । भिसा स्वीकृत भएर पाइलट अध्ययनको लागि अमेरिका जाने अन्तिम तयारीमा रहेका दिपेन्द्रलाई ग्लोवल टेलिभिजनका अध्यक्ष प्रभुराम श्रेष्ठले आर्थिक सहयोग गरेका हुन् ।
ग्लोवल टेलिभिजनको कार्यालयमा अध्यक्ष श्रेष्ठले १ लाख रुपैयाँको चेक हस्तारण गरेको समाचार प्रमुख प्रकाश गिरीले जानकारी दिए।

 चेक लिएपछि दिपेन्द्रले आफ्नो पाइलट बन्ने योजनामा टेलिभिजनले गरेको सहयोग र सद्भावलाई सदैव कदर गरेर अघि बढ्ने भन्दै धन्यवाद समेत ब्यक्त गरेका थिए ।