काठमाडौँ: संखुवासभा सामुहिक हत्याकाण्डको थप अनुसन्धानका लागि प्रदेश १ प्रहरी कार्यालयबाट अनुसन्धान टोली संखुवासभा पुगेको छ । मादी नगरपालिका १ उम्लिङमा भएको हत्याकाण्डपछि हराइरहेको रञ्जनाको मोबाइल लोकबहादुरको घरबाट बरामद भएपछि थप अनुसन्धानका लागि प्रदेश प्रहरीको टोली संखुवासभा पुगेको हो ।

प्रदेश नम्बर १ का प्रहरी प्रमुख डिआइजी अरुण कुमार बिसीका अनुसार हत्यामा भाइको संलग्नताबारे अनुसन्धान गर्न प्रहरी टोलीलाई संखुवासभा पठाइएको हो । हत्याको अनुसन्धान गरी बिराटनगर फर्किएको प्रहरी टोली लोकबहादुरको भाइ नरेश कार्कीको संलग्नताको खोजी गर्दै फेरि संखुवासभा फर्किएको हो ।

भदौ २१ गते बिहान भएको हत्याकाण्डपछि मृतक रञ्जना कार्कीको मोबाइल हराइरहेको थियो । सो दिन बिहान ५ः४४ बजे रञ्जनाको ओप्पो कम्पनीको मोबाइलको स्विच अफ भएको थियो ।

प्रहरीले उक्त मोबाइलको खोजी गर्ने क्रममा लोकबहादुरका भाइ नरेश कार्कीले उक्त मोबाइल चलाएको पाइएपछि बुधबार उनलाई समेत नियन्त्रणमा लिइएको थियो । नरेशले उक्त मोबाइल कहाँबाट कसरी पाए भन्ने सम्बन्धमा थप अनुसन्धान गर्न अनुसन्धान टोली पुनः संखुवासभा फर्किएको हो ।

पक्राउ परेको लोकबहादुरका भाइ नरेश कार्कीले भने उक्त मोबाइल आफ्नो घरमा भेटिएको बयान दिएकाले मोबाइलका सम्बन्धमा थप अनुसन्धानका लागि टोली पठाइएको प्रदेश प्रहरीले जनाएको छ ।