भक्तपुरः मध्यपुरथिमि नगरपालिका–४ चारदोबाटोमा मोटरसाइकल दुर्घटना हुँदा एक जनाकाे निधन भएकाे छ। माेटरसाइकल चालक सोलुखुम्बु चौलाखर्कका २७ वर्षीय रमेशकुमार बस्नेतको निधन भएको हाे भने अन्य दुई जना घाइते भएका छन्।

गए राति करिब ११ः०० बजेतिर काठमाडौंबाट भक्तपुरतर्फ जाँदै गरेको बा७७प ५६०५ नंको मोटरसाइकल आफैँ अनियन्त्रित भई दुर्घटना हुँदा बस्नेतकाे निधन भएको महानगरीय प्रहरी परिसर भक्तपुरका प्रवक्ता एवं प्रहरी नायब उपरीक्षक दीपक गिरीले जानकारी दिए। 

दुर्घटनामा गम्भीर घाइते भएका बस्नेतको त्रिवि शिक्षण अस्पताल महाराजगञ्जमा उपचारका क्रममा आज बिहान साढे २ः०० बजे निधन भएको गिरीले बताए। दुर्घटनामा मोटरसाइकलको पछाडि बसेका उदयपुर ताप्ले गाउँपालिका–५ घर भई काठमाडौं काडाँघारी बस्ने २२ वर्षीय लोकेन्द्र मग्राती र सिन्धुली तीनपाटन गाउँपालिका–५ घर भई काठमाडौं काँडाघारी बस्ने २५ वर्षीय अमित जैरु घाइते भएका थिए।

उनीहरूकाे त्रिवि शिक्षण अस्पताल महाराजगञ्जमा उपचार भइरहेको छ।