काठमाडाैंः बागमती प्रदेशमा कोरोना सङ्क्रमणका कारण एकै दिन ३४ जनाको निधन भएको छ। प्रदेशको सामाजिक विकास मन्त्रालयले सार्वजनिक गरेको तथ्याङ्कअनुसार काठमाडौँमा मात्र ११ महिला र सात पुरुष गरी कूल १८ जनाको निधन भएको हो।

मन्त्रालयका अनुसार ललितपुरका चार, भक्तपुरका तीन, चितवन, दोलखा र सिन्धुलीमा क्रमशः दुई/दुई, रसुवा, रामेछाप र सिन्धुपाल्चोकका क्रमशः एक/एकजना कोरोना सङ्क्रमितको निधन भएको छ। योसँगै बागमती प्रदेशमा कोरोना सङ्क्रमणका कारण निधन हुनेको सङ्ख्या एक हजार ६ सय ५३ जना पुगेको मन्त्रालयका प्रवक्ता डा पुरुषोत्तमराज सेढाईंले जानकारी दिए।

बागमती प्रदेशमा पछिल्लो २४ घण्टामा चार हजार ६ सय ५५ जनामा कोरोना सङ्क्रमण पुष्टि भएको छ। सङ्क्रमण पुष्टि हुनेमा काठमाडौँका दुई हजार सात सय ८८, ललितपुरका ६ सय दुई, भक्तपुरका पाँच सय ३७, रसुवाका एक, नुवाकोटका ७३, धादिङका एक सय १५, चितवनका एक सय २४, सिन्धुलीका ४७, मकवानपुरका एक सय १६, रामेछापका २४, दोलखाका १५, काभ्रे एक सय ५५ र सिन्धुपाल्चोकका ५८ जना रहेका छन्।

बागमती प्रदेशमा सक्रिय सङ्क्रमितको सङ्ख्या ५३ हजार तीन सय ७५ जना रहेकाे छ।