रास्वपा सभापति समेत रहेका उपप्रधान तथा गृहमन्त्री रवि लामिछानेले सहकारी ठगको ट्याग बोकेर हिंड्नुपरेको गुनासो गरेका छन् ।
काठमाडौंमा आयोजित एक कार्यक्रममा उनले धेरै सहकारी पीडितको बचत फिर्ता गराउन र सहकारी समस्याको समाधान गर्न आफूले पहल गरे पनि सहकारी ठगको ट्याग लगाइएको गुनासो गरेका हुन् ।
‘सहकारी पीडितहरुका लागि कैयौं रिपोर्टहरु बनाइयो, कतिका लागि लडियो । कतिलाई जेल पठाइयो, कतिको पैसा फिर्ता लगाइयो । अहिले सहकारी ठगको ट्याग बोकेर हिंड्नुपरेको छ ।  मेरो भाग्य यस्तै छ’, उनले भने ।
सहकारी ठगी प्रकरणमा गृहमन्त्री लामिछाने जोडिएको सहकारी प्रकरण छानबिन गर्न संसदीय छानबिन समिति गठन भएको छ ।