धनुषाः पोखरीमा डुबेर पाँच बालिकाको एकैपटक निधन भएपछि ज्यान गुमाएका बालिकाकाे परिवारलाई प्रदेश नं २ सरकारले राहत उपलब्ध गराउने भएकाे छ। प्रदेश सरकारले राहतस्वरूप रू एक÷एक लाख दिने घोषणा गरेको छ।

धनुषाको दक्षिणी सीमावर्ती मुखियापट्टि मुसहरनिया गाउँपालिका–६ स्थित पोखरीमा डुबेर स्थानीय पल्टु यादवकी १२ वर्षीया छोरी लक्ष्मीनिया, जोगिन्द्र भगतकी १० वर्षीया छोरी चन्द्रकुमारी, राजगिर पूर्वेकी १३ वर्षीया छोरी मञ्जु, जगरनाथ ठाकुरकी १२ वर्षीया छोरी चान्दनी र उतिम साह तेलीकी १२ वर्षीया नातिनी ललिताको निधन भएको थियो।

नवनियुक्त भौतिक पूर्वाधार तथा यातायातमन्त्री रामसरोज यादवले राहत उपलब्ध गराउने बताए। मुसहरनिया गाउँपालिका मन्त्री यादव निर्वाचित धनुषाको क्षेत्र नं ३ मा भएको पालिका हो। प्रादेशिक अस्पतालमा मृतक बालिकाको शव परीक्षणपश्चात परिवारलाई जिम्मा लगाउने बेला अस्पताल पुगेर मन्त्री यादवले पीडित परिवारजनलाई शनिबार भेटेर समवेदना प्रकट गर्दै राहत रकमको घोषणा गरेका हुन्।

त्यसैगरी क्षेत्र नं ३ कै सङ्घीय सरकारमा नेकपा एमालेको तर्फबाट समानुपातिक सांसद जुली महतोले गाउँमै पुगेर पीडित परिवारहरूसँग भेटघाट गर्दै व्यक्तिगत तर्फबाट पाँच परिवारलाई प्रतिपरिवार किरिया खर्चस्वरूप रू १० हजार सहयोग गरिन्।

यसअघि उक्त क्षेत्रबाट निर्वाचित सांसद तथा नेपाल सरकारका उपप्रधान तथा शहरी विकासमन्त्री राजेन्द्र महतो, नेपाली कांग्रेसका उपसभापति तथा पूर्व उपप्रधानमन्त्री विमलेन्द्र निधिले विज्ञप्ति तथा समाजिक सञ्जालमार्फत शोक सन्देश जारी गरी घटनाप्रति दुःख व्यक्त गर्दै मृतकप्रति श्रद्धाञ्जलि तथा शोकाकुल परिवारजन र गाउँवासीप्रति समवेदना प्रकट गरेका थिए।

मृतक पाँचै जनाको शव परीक्षणपश्चात् गाउँ लगेर अन्तिम संस्कार गरिएको छ। गरिब विपन्न परिवारका बालिकाहरुको एकै ठाउँमा एकैपटक निधन हुँदा अहिले गाउँ शोकमा डुबेको छ।